Չորեքշաբթի, 12.08.2020, 13:35
Ողջույն, Անցորդ: Լավ օր եմ ցանկանում: Ժպտա:


Հոդվածներ

Գլխավոր » Հոդվածներ » 2012 թվ. » Ապրիլ #01

Լուսանկարել չի կարելի
Լուսանկարել չի կարելի

Ամառ, հայ-թուրքական սահման, գյուղ Հայկաձոր:


-Հե~յ, նաչալնիկին կանչի~...
-Հիմա իմացա՞ք, որն է անլար հեռախոսը:
Ձեռքս մոտեցնում եմ բերանիս, որ չերևա, որ կամացուկ ծիծաղում եմ:
-Հիմա կգա, - ասում է փշալարերից այն կողմ գտնվող հայ զինվորը:

Տեսնես ի՞նչ է մտածում հիմա: Չէ, դեմքից էլ երևում է, որ խղճով է: Նրան էլ հաստատ դուր չի գալիս, որ այսքան կանայք ու երեխաներ սպասում են այս անտանելի արևի տակ: Հաստատ: Եթե նրա կամքը լիներ, առանց «նաչալնիկին» սպասելու կբացեր դռները ու կասեր. «Անցեք, ժողովուրդ ջան, գնացեք ձեր եկեղեցին, հանգիստ աղոթք արեք»: Հաստատ, ավելի ճիշտ, ես եմ ուզում, որ այդպես լինի, դրա համար էլ այդպես եմ մտածում:

Վերջապես գալիս է ռուս «նաչալնիկը»:

-Кто у вас главный?

Զարմանում եմ, ինչո՞ւ անպայման մեզ մոտ «главный» պիտի լինի: Մենք այստեղ բոլորս էլ հավասար ենք: Եվ ռուս «նաչալնիկը» միանգամից կոպիտ ու նույնիսկ մի քիչ վախենալի է թվում ինձ:

Մինչ տղամարդիկ պարզում են, ով է նրանցից «главный», կանայք կատակում են. «Հիմա մեզ գլխաքանակով հաշվելու են»: Դառը կատակ էր...

Վերջապես «նաչալնիկը» թույլ է տալիս բացել դռները: Հերթով մտնում ենք ներս կամ դուրս ենք գալիս, արդեն ինքս էլ չեմ հասկանում: Հեռվում երևում է եկեղեցին: Միանգամից միացնում եմ «լուսանկարչական ապարատը» (ինչպես կասեր ընկեր Սոնան): Հետո անջատում եմ:

-Լուսանկարել կարելի՞ է:

Ուրիշ ժամանակ և ուրիշ վայրում երբեք թույլատվություն չէի խնդրի, այդ էր մնում պակաս: Բայց հիմա, չգիտես ինչու, հիշեցի ընկեր Սուսոյի վաղուց մոռացված դասերը. «Ֆատոգռաֆը իրավունք ունի նկարել ամեն տեղ, բացի սեփական տարածքներից, օդանավակայանից, մետրոյից ու սահմանային տարածքներից»: Ավելի լավ է, չհիշեի:

-Саму церковь фотографировать можете, но больше ничего.

-Եկեղեցին կարող եք նկարել, էրեխեք ջան, բայց այ գետի ափը արդեն չի կարելի, - թարգմանում է հայկաձորցիներից մեկը:

Թարգմանության կամ բացատրության կարիք չունեմ, ինքս էլ եմ հասկանում, որ ռուս «նաչալնիկը» դուրս ընդհանրապես չի գալիս:

Զինվորների ուղեկցությամբ շարժվում ենք դեպի եկեղեցի: Ինչո՞ւ են այդքան ուշադիր նայում, վախենում են, որ ինչ-որ ավելորդ բա՞ն կլուսանկարենք: Դե, լուսանկարել չի կարելի... եկեղեցուց բացի:

Սկսում եմ լուսանկարել եկեղեցին: Գմբեթ, պատուհան, վառվող մոմեր: Երբ եկեղեցի է մտնում ռուս «նաչալնիկը», անջատում եմ ապարատը: Նա կանգնում է դռան շեմին ու լսում «Սուրբ, սուրբ»-ը: Հետաքրքիր է, ի՞նչ է մտածում հիմա:

Դուրս ենք գալիս եկեղեցուց: Նորից եմ լուսանկարում այն, նորից ու նորից: Հանկարծ լսում եմ ռուս «նաչալնիկի» ձայնը.

-У меня есть фляжка с водой. Намочите лицо и шею.

Շրջվում եմ ու տեսնում, որ «նաչալնիկը» իր «ֆլյաժկայից» ջուր է լցնում հայկաձորցիների ձեռքերին: Չէ, երևի այդքան էլ վատը չի:

Արդեն համարյա հասանք դարպասներին: Վերջին հնարավորությունս է: Մեկ անգամ ևս նկարում եմ եկեղեցին: Հետաքրքիր նկար է ստացվում. առաջին պլանում ֆոկուսի մեջ չորացած չյուղեր, երկրորդ պլանում` ֆոկուսից դուրս` ճգնավոր եկեղեցին: Չեմ ասի, որ պատահական է ստացվել:



Ընկեր Սուսոն, երբ տեսնի այս նկարը, կասի. «Ապրես, պլանների հետ ես աշխատել»: Պատահական տեսնողը կասի. «Է~, ինչո՞ւ ես եկեղեցին լղոզել»: Բայց ինձ համար այս նկարը, հիմա` մի քանի օր անց, յուրահատուկ իմաստ է ձեռք բերել: Չէ՞ որ եկեղեցին, որը սպասում է, թե երբ պիտի հայերը նորից գան և «Սուրբ, սուրբ»-ը երգեն, այդ եկեղեցին վերջնակետն է: Եկեղեցուց այն կողմ լուսանկարել չի կարելի:

Սոնա Արսենյան
Բաժին` Ապրիլ #01 | Ավելացրեց` Tado-sempai | Հեղինակ`
Դիտվել է 474 անգամ| |Վարկանիշ` 5.0/1
ՄԵկնաբանվել է 1 անգամ
0  
1 margar   (24.04.2012 15:53) [նյութ]
apres Sona ,qez mot lav e statsvum aidpes sharunakel.

Only registered users can add comments.
[ Sign Up | Login ]
Օգտակար ինֆորմացիա
ամսագրի Ձեր ցանկացած համարն ընթերցելու համար սեղմեք համապատասխան համարի շապիկին
Գլխավոր ցանկ
Գովազդ
Հունիսի 1-ին մոսկովյան 25 հասցեում բացվեց արդեն մեզ բոլորիս հայտնի LAKI քաղցրավենիքների նոր կաֆետերիան: Առաջին խորանարդ
Ենթացանկ
Ապրիլ #01 [23]
Մեր ամսագրի անդրանիկ համարը` Ապրիլ 2012, կամ #Ապրիլ 01, կամ ուղղակի Ապրիլ :)
Մայիս #02 [23]
Մեր ամսագրի երկրորդ համարը` Մայիսը
Հունիս #03 [14]
Հուլիս #04 [23]
Օգոստոս #05 [23]
Սեպտեմբեր #06 [23]
Reading Hall [5]
Հայաստանի պատանի ընթերցասերների միավորման կողմից իրականացված գրքի երևանյան տոն:
Հոկտեմբեր #07 [22]
Նոյեմբեր #08 [16]
Դեկտեմբեր #09 [23]
Ապոկալիպսիս [5]
Երաժշտական Բլոկ
Գովազդ
Տարածե'ք մեզ
Գովազդ
Երրորդ խորանարդ Կարող եք գտնել Երևանի բոլոր գրախանութներում: 
Գինը' 4200 դրամ
Գովազդ
Մանրամասն տեղեկությունների համար սեղմեք նկարի վրա: Չորրորդ խորանարդ
Հարցում
Ինչպես ես հայտնվել մեզ մոտ?
պատասխանել է 364 մարդ
Առաջարկում ենք'