Հոդվածներ

Գլխավոր » Հոդվածներ » 2012 թվ. » Հոկտեմբեր #07

Իրերն էլ իրենց ճակատագիրն ունեն

-Ինչպես մարդիկ, իրերը նույնպես իրենց ճակատագիրն ունեն: Հայկ Հարությունյանը Բյուրականի աստղադիտարանի տնօրենն է, բայց նման չէ այն փողկապավոր տնօրենների, ում սովոր ենք տեսնել բանկերում և օֆիսներում: Բարեհոգի, ժպտերես, մի խոսքով՝ անչափ հաճելի մարդ, բայց այս գրառումը նրան չէ նվիրված: Ափսո՜ս, - կասեք դուք:(?) Ո՜չ, - կպատասխանեմ ես: Եկեք մինչև վերջ կարդանք, պատմությունս, փառք աստղազարդ երկնքին, այնքան էլ երկար չէ: Իսկ վերջում կասեք՝ հետաքրքի՞ր էր, թե՞ պետք էր պարոն Հարությունյանի մասին ավելի շատ գրել: Եվ այսպես... -Ինչպես մարդիկ, իրերը նույնպես իրենց ճակատագիրն ունեն: Այս աստղադիտակի ճակատագիրը շատ հետաքրքիր է, - իր պատմությունն է սկսում պարոն Հարությունյանը: Խոսքը Բյուրականի աստղադիտարանի Շմիդտի* 1մ աստղադիտակի մասին է: Եթե ես ասեմ, որ այն աստղադիտարանի ամենամեծ ու ամենաարդյունավետ աստղադիտակներից մեկն է, ուրեմն ոչինչ չեմ ասի, քանզի այս աստղադիտակն իր Ճակատագիրն ունի: 1937 թ-ին (եթե, իհարկե, ես ճիշտ եմ հիշում թիվը, որովհետև թվեր հիշելը իմ թույլ հիշողության ամենաուժեղ կողմը չէ) Հիտլերը սարքել է տալիս այս աստղադիտակը՝ ցանկանալով այն նվիրել Մուսոլինիին: Բայց Երկրորդ Աշխարհամարտն այնպես չավարտվեց, ինչպես կցանկանար Ֆաշիստական Գերմանիայի առաջնորդը, և կիսավարտ աստղադիտակը այլ աստղադիտակների հետ միասին, որպես ռազմավար, չվեց Խորհրդային Միություն: Խորհրդային Միությունը, ինչպես գիտենք, բազմազավակ մայր էր: Ու պատերազմի ավարտից հետո իրեն հասած ռազմավարը սկսեց կիսել իր զավակների միջև: Այդ թվում նաև աստղադիտակները: Բյուրականի աստղադիտարանը այդ ժամանակ ներկայացնում էր Վիկտոր Համբարձումյանը: Ու դա զարմանալի չէ: Զարմանալին այն է, որ Վիկտոր Համազասպովիչը, ով մեծ հարգանք էր վայելում ամբողջ Խորհրդային միությունում և կարող էր Բյուրականի աստղադիտարանի համար ընտրել ցանկացած աստղադիտակ, ձեռքը դրեց Մուսոլինիի համար նախատեսված այս անավարտ աստղադիտակի վրա և ասաց. <<Այս մեկն եմ ուզում>>: (Հետո էլ մարդիկ ասում են, որ ինտուիցիա ասածը սուտ բան է:) Ինձ թվում է Շմիդտի 1մ այս աստղադիտակը չէր ուզում հայտնվել Մուսոլինիի մոտ, որքան էլ Հիտլերը ցանկանում էր այդ: Ու չհայտնվեց: Փոխարենը հայտնվեց Բյուրականի աստղադիտարանում և դարձավ աշխարհի ամենամեծ և ամենաարդյունավետ Շմիդտի դիտակներից մեկը: Ահա այսպես: Պատմությունս, ավելի ճիշտ, պարոն Հարությունյանի պատմությունը շատ կարճ էր: Բայց իր մեջ ներառում է մի ամբողջ Ճակատագիր: ________________________________________________________________________ *Շմիդտի աստղադիտակ - 1930 թ-ին Համբուրգի օբսերվատորիայի աշխատակից Բերնհարդ Շմիդտը բարելավեց արդեն գոյություն ունեցող աստղադիտակը և, փաստորեն, ստեղծեց իրե սեփականը: Շմիդտի աստղադիտակը կիրառվում է հատկապես աստղային երկնքի չափումների ժամանակ: Այս աստղադիտակի առավելությունը մեծ տեսադաշտն է՝ մինչև 6o: Եթե այսպիս բաներից գլուխ եք հանում, ավելի մանրամասն կարող եք կարդամ այստեղ:
1 2 3 4 5 Բաժին` Հոկտեմբեր #07 \| Ավելացրեց` Ари-сан \| Հեղինակ`
Դիտվել է 459 անգամ\| \|Վարկանիշ` 0.0/0