Հոդվածներ
Երջանկության գաղտնիքը
Կար-չկար, մի վաճառական կար: Իր մինուճար որդուն այս վաճառականը ուղարկեց գլխավոր Իմաստունի մոտ՝ երջանկության բաղադրատոմսն իմանալու:
Քառասուն օր գնաց տղան անծայրածիր անապատով, և վերջապես տեսավ սարի գագաթին մի հրաշակերտ պալատ. այդտեղ էր ապրում գլխավոր Իմաստունը, ում նա փնտրում էր:
Հակառակ իր սպսելիքներին՝ պալատը բոլորովին նման չէր ճգնավորի կացարանի: Այստեղ-այնտեղ երևում էին վաճառականներ, ովքեր իրենց ապրանքն էին առաջարկում հյուրերին: Ամենուր երգ, պար, ուրախություն:
Իմաստունն առանց շտապելու ողջունում էր իր բոլոր հյուրերին, և տղան ստիպված երկու ժամ սպասեց, մինչև իր հերթը հասավ:
Իմաստունն ասաց, որ հիմա ժամանակ չունի տղային բացատրելու երջանկության գաղտնիքը: Թող տղան շրջի պալատի սրահներով և երկու ժամ անց վերադառնա այս նույն սենյակը: Այդ ժամանակ նա կպատասխանի ցանկացած հարցի:
-Հա՜, ու մի բան էլ, - ասաց Իմաստունը: - Ես մի խնդրանք ունեմ: Վերցրու այս թեյի գդալը՝ երկու կաթիլ անուշահոտ յուղով: Գնա, շրջիր պալատով, բայց տե՛ս, յուղը չթափես: - Եվ նա տղային տվեց թեյի գդալ՝ երկու կաթիլ անուշահոտ յուղով:
Տղան վերցրեց գդալը: Աչքը չէր կտրում գդալից, որ հանկարծ չթափի յուղը: Այդպես նա շրջեց բոլոր սրահներով ու վերադարձավ Իմաստունի մոտ:
-Դե ի՞նչ, - հարցրեց Իմաստունը, - հավանեցի՞ր իմ թանկարժեք պարսկական գորգերը: Հիացա՞ր իմ պարտեզով: Գիտե՞ս, ամենահմուտ այգեպաններն աճեցնում էին այն տասը տարի: Իսկ իմ գրադարանի մագաղաթները տեսա՞ր: Ես հրաշալի գրադարան ունեմ, չէ՞:
Ամոթխած պատանին խոստովանեց, որ նա ոչինչ էլ չի տեսել, քանի որ կլանված էր այն երկու կաթիլ յուղով, որ իրեն էր վստահել Իմաստունը:
-Չեղա՜վ, - ասաց Իմաստունը: - Չի կարելի վստահել մարդուն, մինչև չիմանաս՝ որտեղ և ինչպես է նա ապրում: Գնա, նորից շրջիր սրահներով: Հա՜, ու գդալը չմոռանաս:
Տղան նորից անցավ պալատի բոլոր սրահներով: Այս անգամ նա մեծ հաճույքով զննեց և՛ հրաշք պարտեզը, և՛ Իմաստունի գրադարանը, տեսավ սրահները զարդարող բոլոր արձաններն ու նկարները: Նույնիսկ նկատեց, որքան գեղեցիկ են սարերը պալատի շուրջը:
Երբ նա վերադարձավ Իմաստունի մոտ, ոգևորված պատմեց այն ամենի մասին, ինչ տեսավ նրա պալատում:
-Շա՜տ լավ, - ասաց Իմաստունը: - Իսկ որտե՞ղ են այն երկու կաթիլ անուշահոտ յուղը, որ ես խնդրեցի չթափել:
Եվ հանկարծ տղան նկատեց, որ թափել է յուղը:
-Սա է միակ բաղադրատոմսը, - ասաց իմաստունների Իմաստունը: - Երջանկության գաղտնիքը նրանում է, որ կարողանաս տեսնել քեզ շրջապատող աշխարհի բոլոր հրաշքները և երբեք չմոռանաս այն երկու կաթիլ յուղի մասին, որ տանում ես թեյի գդալով:
|
| Բաժին` Հոկտեմբեր #07 | Ավելացրեց` Ари-сан | Հեղինակ`
|
| Դիտվել է 484 անգամ|
|Վարկանիշ` 0.0/0 |
|
Օգտակար ինֆորմացիա
 ամսագրի Ձեր ցանկացած համարն ընթերցելու համար սեղմեք համապատասխան համարի շապիկին
Գովազդ
Առաջին խորանարդ
Գովազդ
Երրորդ խորանարդ
Գովազդ
Չորրորդ խորանարդ
|
ամսագրի Ձեր ցանկացած համարն ընթերցելու համար սեղմեք համապատասխան համարի շապիկին
Առաջին խորանարդ
Չորրորդ խորանարդ
