Հոդվածներ

Գլխավոր » Հոդվածներ » 2013 թվ. » Մայիս #05

Փոքրիկ պատմություններ մեծ կյանքից

Փոքրիկ պատմություններ մեծ կյանքից Ճախրանքը սկսվում է վստահությունից: Վստահության հիմքում ընկած է հավատը: Հավատի հիմքում` սերը: Իսկ սիրուց լույս է ծնվում: Ճախրել չկարողացողները սողում են ու նախանձով են նայում ճախրողներին: Նրանք ընդունակ են ամեն գնով ճախրողին ցած տապալելու, քանի որ իրենք մինչև անգամ քայլել չեն կարող, սողում են: Իսկ ճախրելու համար պետք է վստահություն, որի հիմքում ընկած է հավատը, իսկ նրա հիմքում` սերը… Լույսը հեռու չէ. ուղղակի ներս նայել է պետք. այն բոլորիս հոգիների մեջ է: Որովհետև Դա այն պատառն էր, որ կուլ չգնաց: Թեկուզև սոված էիր, թեկուզ գիտեիր, որ քեզ մի պատառ է պետք, որովհետև առանց դրա չես կարող շարունակել: Բայց կուլ չգնաց պատառը: Կուլ չգնաց… Քարացավ, գունդ դարձավ ու մնաց կոկորդում: Որովհետև… Որովհետև դժվար է հավատալ մարդու պարզությանը: Որովհետև մարդիկ այդ պարզությունն ընկալում են որպես խորամանկություն: Որովհետև հեշտ է դատապարտելը, որովհետև կան մարդիկ, ովքեր սրտատրոփ սպասում են ձախողումների, որ քննադատեն ու խորիմաստ խոսքեր ասեն: Նրանց փիլիսոփայելու համար անպայման ուրիշի անկումը կամ գոնե ձախողումն է պետք: Որովհետև… Որովհետև իրականում դժվար է ապրելը, ուղղակի ապրելը… Պարզապես ապրելը՝ ոչ թե ուրիշների համար, ոչ թե ուրիշների կյանքով, այլ ամեն մեկն իր համար, ամեն մեկն իր կյանքով… որ չդառնաս կուլ չգնացող պատառ: Ինչո՞ւ է այսքան մութ մութը Ո՞ւր է մութը, որտե՞ղ է թաքնվում նա: Ես ուզում եմ մթության տանը լինել ու բացահայտել, թե ինչո՞ւ է այսքան մութ մութը: Ես ուզում եմ հեղափոխական կոչեր անել մթին, որպեսզի նա կարողանա ձերբազատվել ինքն իրենից, իր քողի տակ տեղի ունեցող ամեն բան ի ցույց դնի, որ ամաչի, որ տարածվի ու թոթափվի վերջիվերո, տարածվելով՝ մաքրագործվի: Մութը մթից … Որովհետև չեմ հասկանում, թե ինչու է այսքան մութ մութը… Լուսինե Մանուկյան
1 2 3 4 5 Բաժին` Մայիս #05 \| Ավելացրեց` Tado-sempai \| Հեղինակ`
Դիտվել է 654 անգամ\| \|Վարկանիշ` 0.0/0